નવી દિલ્હી

હિમાચલઃ એકને બાદ કરતા લાહૌલ સ્પિતિનું આખું ગામ કોરોના સંક્રમિત

નવી દીલ્હી,તા.૨૧
હિમાચલ પ્રદેશના લાહૌલ વેલી સ્થિત એક નાનકડા ગામમાં ૫૨ વર્ષના એક પુરૂષને બાદ કરતા તમામ ગામલોકો કોરોનાની ઝપટમાં આવી ગયા છે. અધિકારીઓના જણાવ્યા મુજબ ખીણના થોરાંગ ગામના ૪૨ લોકો પૈકી ૪૧ લોકો કોરોના પોઝિટિવ આવ્યા છે. થોરાંગ રામ મનાલી-લેહ વચ્ચે આવેલું છે અને તેની કુલ વસી ૪૨ લોકોની છે. ૫૨ વર્ષના ભૂષણ ઠાકુરને બાદ કરતા આ ગામના તમામ લોકોના કોરોના ટેસ્ટ પોઝિટિવ આવતા ખળભળાટ મચી ગયો છે.નેગેટિવ રિપોર્ટ આવ્યો છે તે ભૂષણ ઠાકુરના મતે તેઓ અલગ રૂમમાં રહી રહ્યા છે અને છેલ્લા ચાર દિવસથી પોતાનું ભોજન જાતે જ બનાવી રહ્યા છે. હું પહેલા પરિવાર સાથે જ હતો પરંતુ ટેસ્ટના રિપોર્ટ આવ્યા બાદ હું આઈસોલેટ થયો છું. અગાઉ પણ હું હાથ સેનેટાઈઝ કરવા, માસ્ક પહેરવું તેમજ સામાજિક અંતર સહિતના તમામ નિયમોનું પાલન કરતો હતો. લોકોએ કોરોનાને હળવાશમાં ના લેવો જોઈએ. ઠંડીમાં કોરોના વધુ વકરવાની દહેશત હોવાથી લોકોએ ખૂબ સાવચેત રહેવું પડશે.
એક અહેવાલમાં સૂત્રોને ટાંકીને જણાવાયું છે કે થોડા દિવસ પૂર્વે ગામમાં એક ધાર્મિક કાર્યક્રમ યોજાયો હતો જેમાં ગામના બધા લોકો હાજર હતા. અધિકારીઓ પણ આ કાર્યક્રમને લીધે જ કોરોના વિસ્ફોટ થયો હોવાનું માની રહ્યા છે.સમગ્ર લાહૌલ-સ્પિતિ વેલી વિસ્તાર કોરોના મહામારીના ગંભીર પ્રકોપ હેઠળ આવી ગયો છે. આ વિસ્તારની આસપાસમાં રહેતા મોટાભાગના લોકો કોરોના વાયરસની ઝપટમાં આવી ગયા છે. અહીંના ચીફ મેડિકલ ઓફિસર ડો. પાલ્ઝોરે જણાવ્યું કે, તેમની ટીમ લોકોને ટેસ્ટ કરાવવા સામે આવવા માટે અપીલ કરી રહી છે
જેથી કોરોના સંક્રમણ ફેલાતું અટકાવી શકાય.હવામાનમાં પલટો આવતા તેમજ વાયરલ સંક્રમણ થવાથી કોરોનાનું જોર વધ્યું છે. કોરોના પ્રત્યે જાગરૂકતા ફેલાવવા રાજ્યમાં વિશેષ કાર્યક્રમોનું આયોજન પણ કરવામાં આવ્યું હોવાનું ડોક્ટરે જણાવ્યું હતું. લાહૌલ સ્પિતિ જિલ્લાની વસતી ૩૦,૦૦૦ આસપાસ છે અને મોટાભાગના લોકો શિયાળામાં અન્ય જિલ્લામાં સ્થળાંતર કરી ગયા છે. જિલ્લામાં કોરોનાના કુલ ૮૫૬ પોઝિટિવ કેસ નોંધાયા છે.

Leave a Reply

Your email address will not be published. Required fields are marked *

Related Articles

Back to top button